Imataq QOSQO LLIKA?QOSQO LLIKApiqa mosoq kawsay kashanmi ñawpa kawsaypi. ¡Kunan!.
QOSQO LLIKAQA huk documentalmi mosoq tecnologiapi ruwasqa. Qosqo llikaqa purichiwanchismi kunan pachapi ancha chanin hatun Qosqo Llaqtaq culturanta reqsichiwaranchis imaynan karan Waranqa isqonpachaq kinsa chunka watakunapi.
QOSQO LLIKAQA manan hawan uhun ruwasqa documentalchu, cine pantallallapi, televisionllapi rikunapaqchu; aswanmi mosoq tecnologiakunapi rikuyta atinchis: celularpi, celularpi mensajeta qelqaspa, reproductorkunapi, MP3pi, proyectorkunata perqakunaman k’anchachispa, purishaspanchispas qhawayta atinchis. Ankay tecnologiakunawanmi, QOSQOQ Waranqa isqonpachaq kinsa chunka watakunapi (1930) kawsasqanta, imayna kasqanta qhawayta atinchis.
Waranqa isqon pachaq kinsa chunka watamanta (1930) Qosqopi tukuy imaymana, takiy, tusuy cultura, fotografía, teatro, cuadrokuna llump’iy, filosofía, política t’ikrayta qallariran. Ichaqa, kay watakunapin, Qosqonchista teqsi muyu reqsiran “Capital Cultural Mundial” nispa.
Akakallaw chay kawsaykunatan kunan qonqaripushanchis.
QOSQO LLIKAN q’oñishaqchallata qhawarichiwaranchis, yuyarichiwaranchis Qosqoq ñawpa kawsayninta Soqta p’unchay Abrilmanta Chunka p’unchay Abril killa kama Iskay waranqa chunkayoq watapi. Hinachu, Manachu. Hinan riki.
Llapanchis kusisqa wicharanchis, uraykuranchis Qosqoq ñawpa k’ikllunkunata. Wakin ratutaqa llakirikuranchis manaña ñawpata tarispa. Chay p’unchaykuna yuyariranchis, chanincharanchis imaynas Qosqonchis kasqa karan Waranqa Isqon pachaq kinsa chunka watakunapi.
Simi hunt’ata rimarispaqa QOSQO LLIKA paqarichiran huk rimanakuyta ñawpawan-kunan kawsaywan. Kay rimanakuypaqmi, kay t’akwinakuypaqmi QOSQO LLIKA, ñawpa chanin yachaq runakunata, archivokunata maskariran. Wak- wak Qosqoq k’ikllunkunaq historianta, chay watakuna takiyta, imakunatas radiopi chay watakuna rimaqku, k’anay pinkuylluta, tinyata chay p’unchaykuna uyariranchis, cartakunata ñawincharanchis, mapakunata pichariranchis.
Kunanqa ñawpa runa, yachaqkuna pishillaña kawsakushanku, paykunatan QOSQO LLIKAQA mashkaran, tapuran. Ñawpa periodicopi articulokunatapas ñawinchayta atiranchismi. Chanintan QOSQO LLIKAQA t’aqwiriran Waranqa isqon pachaq kinsa qchunka watapi kawsaymanta.
QOSQO LLIKAQ t’aqwirisqanmi internet pi kashan teqsimuyuntinpi runaq qhawananpaq. Qosqopi tiyaq runapas kunanqa chay mosoq tecnologiakunata hap’irichiyta atinchismi. Kunan yapamanta k’ikllun k’ikllunta puririspa perqapi qhawayta atinchis otaq programakunata uyariyta atinchis. Sichus pipas maypas manaraq ni hayk’akpas Qosqoman hamurankichischu, ichapaschá Qosqo Llikata ñawinchaspaqa, reqsispaqa chayamunkichis.
QOSQO LLIKAQA rimanarichin ñawpa kawsayta kunan kawsaywan.
QOSQO LLIKAN kashan Ingléspi, Castellanopi, Runasimipi. Manan qolqepaqchu, Clicllata ruwaykuy. Qosqo Llika ruwaqkunaq kawsaynintapas reqsiyta atinkin.
UYARISPA PURIYAudiokunata uyarispan yachayta atinki imaynatas José Uriel García chanin qelqaq Qosqeño Iskay chunka siglo qallarishaqtin qhawariran, yuyaran, qelqarantaq Qosqomanta.
José Uriel García qelqaq, paymi qelqaran huk chanin Librota “Nuevo Indio” sutichasqata. Kay libron apakachawanchis Qosqo llaqtaq k’ikllun k’ikllunta, qonqasqanchis kawsaykunata yuyarichiwanchis, reqsirichiwanchis. Tukuy runan Internetmanta urayachiyta atinchis MP3 ninchisman, José Uriel Garcíaq qelqasqanta.
Mana Qosqopi tiyaqkunataq, imaymana niraq ñawpa fotografiakunata, kunan fotografiakunatapas qhawayta atinkichis. Kay fotografiakunan pusakachasunkichis sapanka Qosqoq kawsayninman, culturanman.
Purispa-purispa runasimipi rimaykunata tariyta atinkichis, kay simikunapas yanapasunkichismi Qosqontinpi puriyta, Uriel Garciayaq yuyaymanasqanman hina.
Ñawpaq kaq puriymi qallarin, saphichakun Waqaypatapi; watukuytan atinki qanchis k’iklluta Waqaypata neqpi, Kusipataneqpipas, audiokunata uyarispa Uriel Garciaq nisqanman hina. Kay ñawpaq puriymi yaqa phisqachunka minutos.
Iskay kaq puriymi qallarin, saphichakun, T’oqokachipi (San Blaspi) Kay puriypin watukuyta atinki pishqa k’iklluta. Kay ishkay kaq puriymi yaqa Soqta chunta minutos. Kay puriypin wichankitaq urayunkitaq T’oqokachipi.
Kinsa kaq puriymi qallarin saphichakun San Cristobalpi, kaypin watukuyta atinki pishqa k’iklluta. Kay kinsa kaq puriymi yaqa Soqta chunka minutos, kaypipas wichankitaq uraykunkitaq T’oqokachipi hina.
WAYRA WASIPI PROGRAMAKUNAKay Wayra wasipi Programakunata uyariyta atinki: “La Hora del Charango” nisqa programata. Kikin imaynachus waranqa isqon pachaq kinsa chunka watakunapi uyarikuran kikintan kunanpas uyariyta atinki, ima takikunatan chay watakunapi grabaranku, mosoq grabacionkunatapas, takikunatapas uyariyta atinkin.
“La Hora del Charango” nisqa programan chay watakunapi ancha munasqa, uyarisqa karan.
QOSQO LLIKA “La Hora del Charango” nisqa programamantan pishqa programata ruwakuran, sapanka chunka pishqa minutopi. Chaymantapas sapanka programapi tariyta atinki Qosqo Poetakunaq munanakuymanta wayllunakunamanta qelqasqankuta. Kay programakunatapas uyarichiraykun wak- wak Qosqoq k’ikllunkunapi Abril killapi. CDtapas sapanka runamanmi rakirayku Abril killapi eventota ruwashaspa. Internetpaqtaq haywarimuraykiku ashkha fotokunata ñawpa takiqkunamanta kunan takiqkunamantapas.
TAKIQKUNAQ LLANK’AYNINChunka kutitan sumaq k’achalasqa wayna sipas k’ikllun-k’ikllunpi, plazan-plazanpi pinkuyllota, tamborta, tinyata uyarichiwaranchis, suni kunkakunapas takiykullarankutaqmi.
Kay takiy tusuymanta willarikamurayku “Mensaje de Texto” nisqapi. Pikunan tokanqaku. Maypi. Imay horastan. Kay imaymana willakuytan reqsirichimurayku sapanka presentación ñawpaqta.
Takiq tokaqkunan karanku: Cuarteto de Cuerdas Vilcanota; Esteban Thupa; familia Pillco; Jorge y Fabio Choquehuillca; K’ana Harawi; Leoncio Caviedes; los Melódicos del Cusco; Orquestín Choquehuillca Ayllu; Quinteto de Metales Cusco Brass; Qota taki Ayllu.
Kay sumaq takiqkunan callekunapi, plazakunapi takisqankuta uyarichiwaranchis, takiy tusuyninchista culturanchista qhawarichiwaranchis. Internetpaq manan churayta atiykuchu. Ichaqa, filmaraykun pishi-pishimanta wicharachimusaqku Internetman.
¡Mink’akamushaykikun!. Ama hina kaychischu kutimuychis chayamuychis Videokuna ch’allananchispaq. Chaykamataq Artistakunaq takisqanta tokasqankuta uyariyta atinchis QOSQO LLIKA RADIOQ PROGRAMANPI.
FOTOGRAFIASQosqo k’ikllukunapin fotokunata Waranqa isqon pachaq kinsa chunka watamantaraq qhawarichirayku, Martin Chambiq, Juan Manuel Figueroa Aznarpa ruwasqantapas.
Waranqa isqon pachaq kinsa chunka watapin Qosqopi, Martin Chambi, Juan Manuel Figueroa Aznar ancha chanin, k’achay-k’acha fotokunata orqosqaku Qosqoq kawsayninmanta. Kay iskaynin runakunaq ñawinmi ancha sumaq chanin kawsaykunata mashkaranku, tariranku, ruwarankutaq.
Ñawpa kawsayta, kunan kawsaytawan pukllarichispan Qosqo Llika yapamanta paqarichimuran chay fotokunata.
Kunan kay qhepa wiñay tawa wayna Artistakunan callekunapi, plazakunapi sayaykuspa, tiyaykuspa tutapi qhawarichiwaranchis ñawpa kawsaymanta kay kunan kawsaykama. Mosqoypi hinaraqmi haqay ñawpa kawsayta kay kunan kawsaytapas qhawayta atiranchis. ¡AÑAÑAW!. Chanin kawsayniyoqmá kasqanchis.
Chay sapanka tawa Artistan huk ñawpa runa hina p’acharukuspa callekunapi purikacharanku, ñawpa, kunan kawsaytapas qhawarichiwaranchis.
ANDINA PUNA WARMITusoq Artista Marisol Zumaeta yuyaymanaran, sirarurantaq huk tradicional ñawpa pollerata, kay pollerapin niraq niraq fotokunata qhawarichiwaranchis. K’ikllun-k’ikllunta purispan Marisol kikin tusuran, kikin polleranpitaq qhawachiran Martin Chambiq fotokuna ruwasqanta.
KâANCHARIY POETAPLlunp’iq, tusuq, fotografataq, Mabel Allain, rikhurimuran Martín Chamnbi hina p’acharusqa. Martín Chambitan suticharanku, reqsiranku “El Poeta de la Luz “ nispa. Mabelmi qhawarichiwaranchis chanin ñawpa fotokunata reqsisqa runakunamanta, aswantataq Qosqo Llaqtanchismanta. Kunanqa lluymi t’ikrayakapushan. Manañan ñawpaq hinañachu. ¡Ay ñawpa kawsay! Waranqa isqon pachaq kinsa chunka watakuna. Waranqa isqon pachaq pishqa chunka watapin Qosqota huk millay terremoto thunichiran.
KUKUCHITakiq tusuq, Artista Mauricio Rueda. Waranqa isqon pachaq kinsa chunka watapi runa hina p’acharisqa, paypas Qosqoq k’ikllunkunapi, plazankunapi Martin Chambiq, Figueroa Aznarpa, Eulogio Nishiyamaq fotografiakuna ruwasqankuta qhawarichiran.
TAYTA CURATayta Cura hina p’acharukuran Augusto Navarro, paymi Figueroa Aznarpa autorretratokuna Waranqa isqon pachaq kinsa chunka watapi ruwasqanta qhawachiran.
Kay tawantin Artistakunan purikacharanku paykuna kikin kunan kawsashaq, purishaq Qosqo runakunawan rimanakuranku tapunakuranku ima.¡Mink’akuy! Ama hina kaychischu kutirimuychis kay kikin sitioman, Videokuna ch’allananchispaq.
PERIODICO QOSQO LLIKAKay Periodicota ñawinchayta atiranchis Waranqa isqon pachaq kinsa chunka watapi kawsay reqsinanchispaq. Qosqo Llikapas reqsichikuran. Huk willakuykunapas kay periodicopi qelqakuranmi.
Qosqo Llika, llika hinan tupanachiran ñawpata kunanwan, chay raykun Qosqo runapaq qelqakuran periódico kinsa chunka Abril Waranqa isqon pachaq kinsa chunka fechawan. Kay kikin p’unchaypin, watapin José Uriel García publicaran Libronta “El Nuevo Indio” sutichasqata.
Periódico Qosqo Llika qelqakuran kinsa simipi: Ingléspi, Castellanopi, Runasimipi. Kay periodicopin ñawinchayta atiranchis Uriel Garcíawan tapunakuyta. Huk articulota takiymanta tusuymanta Waranqa isqon pachaq kinsa chunqa watapi qelqasqata. Askha fotokunata Uriel Garciaq ruwasqanta rikuyta atiranchis kay periodicopi, kashallarantaqmi mapakuna Qosqo llikawan purinapaq Soqta p’unchaymanta Chunka p’unchaykama Abril killapi Isqay Waranqa Chunkayoq watapi.
Chunka phisqayoq copiakunan lluyman rakikuran mana qolqellapaq. Kay periodicota ñawinchayta munaspaqa Clicta ruway periódicoq ch’askanpi.
QOSQO LLIKA está dirigido por el artista canadiense David McIntosh, un galardonado cineasta que ha estado trabajando en el campo de la producción de nuevos medios de comunicación durante los últimos cinco años. McIntosh ha reunido un equipo internacional de colaboradores para construir QOSQO LLIKA con él, incluyendo al escritor, director y productor Walter Aparicio, los músicos Omar Vargas y Gladys Conde, los artistas performance y de instalaciones Mabel Allain, Mauricio Rueda, Marisol Zumaeta y Augusto Navarro, y al diseñador de interacción Patricio Dávila.
QOSQO LLIKA es una obra de arte sin fines de lucro financiada por el Consejo Canadiense para las Artes y apoyado por la Municipalidad del Cusco, Telefónica Perú, el Archivo Martín Chambi, la Embajada de Canadá en Perú, CRESPIAL / UNESCO, Amauta Project y el Centro Bartolomé de las Casas en Cusco.